میدان کربلا میں گرمی کی شدت میر انیس

میدان کربلا میں گرمی کی شدت

میرانیس

بند نمبر1: ٭میرببر علی انیس بلند پایہ مرثیہ گو شاعر تھے۔ نظم "میدان کربلا میں گرمی کی شدت" ان کے ایک طویل مرثیے کا حصہ ہے جس میں میدان کربلا میں گرمی کی شدت کو تخیلاتی طور پر بیان کیا گیا ہے۔وہ کہتے ہیں کہ جس روز جنگ کا آغاز ہوا تھا تو اس وقت شدید گرمی تھی۔اسے بیان کرنے کے لیے میرے پاس الفاظ نہیں ہیں اور مجھے ڈر ہے کہ میری زبان کہیں جلنے ہی نہ لگ جائے۔کرب وبلا ایک ایسا علاقہ ہے جس میں شدید گرمی ہوتی ہے حضرت امام حسین رضی اللہ عنہ کوفہ کی طرف اپنی بیعت کے لیے عازم سفر تھے کہ یزیدی لشکر نے انہیں کرب وبلا میں پڑاؤ ڈالنے پر مجبور کردیا۔
٭٭اتنی لو تھی کہ ہر ذی روح اس کی گرمی سے پناہ مانگی تھی اور ہر ایک اللہ کی امان طلب کررہا تھا۔ میدان جنگ کی زمین پگل جانے والے لوہے کی طرح سرخ ہوچکی تھی۔جب گرمی زوروں پر ہوتو شدت تپش کے باعث آسمان کا رنگ بھی بدل جاتا ہےدھول اور مٹی اڑنے کی وجہ سے فضا ایک خوفناک منظر پیش کرتی ہے۔
٭٭٭عام طور پر پانی بخارات بن کر اڑے تو ہوا میں خنکی پیدا ہوتی ہےلیکن وہاں بالکل متضاد منظر تھا۔گرم لو کی تیز ہوا ہر شے کو خشک کررہی تھی۔ اتنی شدید گرمی تھی کہ ہوا میں شدید تپش تھی۔ گرم ہوا گویا کسی آگ کے آلاؤ سے آرہی تھی جس نے پورے صحرا کو تنور کی گرم کردیا تھا۔
بند نمبر 2: ٭حضرت امام حسین رضی اللہ عنہ کی سچائی پر ڈٹ کر انتہائی تکلیف کو میر انیس نے بیان کرتے ہوئے کہا ہے کہ سورج کی حدت اپنی پوری شدت کے ساتھ ہر زمینی شے کو متاثر کررہی تھی۔ اتنی تپش تھی کہ انسان چرند پرنداور تمام مخلوقات اس سے متاثر ہورہی تھی۔دھوپ سے فضاجل کر کالی ہوگئی تھی اور دن میں رات کا سماں تھا۔
٭٭میدان کربلا میں نہر علقمہ کے لب گرمی کی تپش سے سوکھے ہوئے تھے اور پانی بالکل ختم ہوچکا تھا۔شدید گرمی اور حدت سے خیمے بھی انتہائی تپ رہے تھے ۔ میدان کرب و بلا میں جہاں امام حسین رضی اللہ عنہ خیمہ زن تھے ۔ وہ شدید گرمی کی تکلیف کو ایسے ہی سہہ رہے تھے جیسا کہ اس خیمہ کو آگ پر رکھ دیا ہو۔
٭٭٭عام طور پر نہر اور دریا کے اردگرد کا علاقہ گرمی ہونے کے باوجود تپش سے محفوظ ہوتا ہے لین میدان کرب وبلا میں شدید گرمی اور حدت سے زمین سوکھ چکی تھی اور اوپری تہ دھول اور مٹی میں تبدیل ہوچکی تھی۔ریت اور مٹی ہوا کے دوش پر اڑ رہی تھی۔زندگی کا چشمہ خشک ہوچکا تھا۔دھوپ کی تپش سے دریائے فرات کا پانی یوں کھول رہا تھا گویا اسے آگ کے الاؤ پر رکھ دیا گیا ہو۔
بند نمبر 3: ٭زیر تشریح شعر میں شاعر کہتا ہے کہ وہ جانور جو پانی کے تالابوں اور جھیلوں میں بیٹھ کر گرمی کا مقابلہ کر رہے تھے اور پانی سے ٹھنڈک حاصل کرنے کی کوشش کررہے تھے۔ گرمی کی شدت کی وجہ سے وہاں سے باہر نہیں نکل رہے تھے۔مچھلیوں نے اپنا ٹھکانہ گہرے سمندر میں بنا لیا تھا اور گرمی کی شدت سے بچنے کے لیے وہ گہرے پانی میں چلی گئی تھیں۔
٭ہرن ایک پھرتیلا جانور ہے اس دن گرمی کے شدت نے ان کو نڈھال کردیا تھا اور وہ انتہائی سست ہوچکے تھے۔ چیتا جو کہ دیکھنے میں ہوشیار دکھائی دیتا ہے وہ بھی شدید گرمی کے سبب سیاہی مائل دکھائی دینے لگ گیا تھا۔یعنی گرمی نے ہر ایک جاندار کو نڈھال اور لاغر بنا کر رکھ دیا تھا۔پتھر جن کا پگھل جانا ایک انہونی بات ہے ۔ شاعر گرمی کی شدت کو بیان کرنے کے لیے ہرممکن کوشش کررہاہے اور وہ کہتا ہے کہ پتھر بھی گرمی کا مقابلہ نہیں کرپارہے تھے اور وہ بھی پگھل جانے والے موم کی طرح ہوچکے تھے۔
٭میدان کربلا میں گرمی کی جو شدت پڑرہی تھی اس کی کوئی مثال موجود نہیں ہے شاعر کہتا ہے کہ گرمی کی وجہ سے پھولوں کی سرخی اڑ گئی تھی یعنی پھول اپنا رنگ وروپ ختم کرچکے تھے اور مرجھائے ہوئے تھے۔دھوپ کی حدت رنگ اڑا لے جاتی ہے اور اسی وجہ سے سبز گھاس سوکھ کر پیلی پڑھ چکی تھی۔ کنوئیں میں موجود پانی دیکھ کر یوں لگتا تھا کہ جیسے شدید تپش کی وجہ سے کنواں سایہ کی تلاش کررہا ہو اور پانی گرمی سے گبھرا کر سائے کی تلاش میں گہرائی میں اتر چکا تھا۔
بند نمبر 4: ٭میر انیس میدان کرب و بلا جہاں حسینی اور یزیدی لشکر کا مقابلہ تھا ۔ شاعر کہتا ہے کہ کہ دور دور تک پھیلے ہوئے درختوں میں کوئی پھول نظر نہیں آرہا تھا نہ ہی کوئی پتا یا پھل نظر آرہا تھا اور چھوٹے چھوٹے پودے گرمی کی شدت کی وجہ یوں جل رہے تھے کہ وہ چنار کی مانند نظر آرہے تھے۔ دسویں محرم کو بے حد گرمی تھی۔ہرچیز مرجھا چکی تھی۔ کھجوروں کے باغ بھی مانند چنار کے درخت کے مانند دکھائی دے رہے تھے۔سارے نخلستان ٹند منڈ ہوچکے تھے۔
٭گرمی کی شدت اس قدر تھی کہ کہ درختوں کے پھول بھی مرجھا گئے تھے اور پتے اور پھل بھی گرمی کی وجہ سے جل کر اپنا نام ونشان کھوچکے تھے۔ نہ توکہیں کلیاں تبسم کرتی تھیں اور نہ سبزہ زار مہکتے تھے۔گویا گرمی نے سب کو حصار میں جکڑ رکھا تھا۔یہاں تک کہ وہ شاخیں جن پر پھل لگتے ہیں وہ بھی سوکھ گئی تھیں اور ایسے لگتی جیسے سوکھا ہوا کانٹا۔
٭شدید گرمی کی وجہ سے زندگی مر رہی تھی اور سبز پتے زرد نظر آرہے تھے ان کا رنگ ایسا تھا جیسے ایک دق کے مارے ہوئے مریض کا رنگ ہوتا ہے۔ ہر کوئی پریشان تھا اور زندگی ختم ہونے کے خوف سے دو چارتھا۔درختوں اور پودوں کے پتے تپ دق کے مریض کی طرح پیلے پڑچکے تھے یعنی ان میں زندگی کی رمق ختم ہوچکی تھی۔
بند نمبر 5: ٭میرا انیس میدان کرب و بلا میں گرمی کی شدت کو بیان کرتے ہوئے کہتے ہیں کہ اس قدر شدید گرمی تھی کہ شیر جیسا جانور جو ہر وقت شکار کی تلاش میں بیٹھا رہتا ہے وہ اپنے کچھا ر سے باہر نہ نکلتا تھا۔ ہرنوں کی جان لبوں پر آئی ہوئی تھی وہ بھی سر سبز وشاداب باغوں کے سائے میں بیٹھ کر گرمی سے بچنے کی کوشش کررہے تھے۔
٭شدت کی گرمی کی وجہ سے پیدا ہونے والے گردو غبار نے سورج کے چہرے کو دھندلا کردیا تھا۔ زمین اس قدر گرم تھی کہ وہ آسمان کی جانب بخارات بن کر اڑ رہی تھی اور اس کی حدت سے آسمان کو بخار ہوچکا تھا۔
٭زمین پر موجود تمام ذی روح بے چین اور بے حال تھے۔ ہر کوئی شدید گرمی سے انتہائی کرب و پریشانی میں مبتلا تھا۔گرمی برداشت سے باہر ہوچکی تھی۔زمین بھٹی پر رکھے ہوئے برتن کی طرح تپ چکی تھی کہ اس اگر کوئی اناج کا دانہ بھی گرتا تو وہ بھی فورا بھن جاتا۔شاعر امام حسین رضی اللہ عنہ کی ثابت قدمی کو بیان کرنے کی ہرممکن کوشش کررہا ہے کہ شدید گرمی کے باوجود تمام چیزیں اپنا آپ تبدیل کرچکی تھیں لیکن یہ امام حسین رضی اللہ عنہ کی ذات تھی جو کہ استقلال و پامردی کا مظاہر ہ کررہی تھی۔
بند نمبر 6: ٭شاعر گرمی کی شدت کو بیان کرتے ہوئے کہتا ہے کہ دریا میں پیدا ہونے والے بھنور ایسے دکھائی دے رہے تھے جیسے آگ کے شعلے گھوم رہے ہوں۔پانی کے بلبلے گرمی کی شدت کی وجہ سے سرخ انگاروں کی طرح چمک رہے تھے اور پانی آگ اچھال رہا تھا۔
٭پانی کی تمام موجیں بے چین تھیں اور پانی کی لہر جب ساحل تک آتی تو ایسے لگتا تھا کہ جیسے اس کی زبان منہ سے باہر آگئی ہو اور پیاس کی شدت کی وجہ سے لہرا رہی ہو۔اتنی شدید گرمی تھی کہ کہ پانی میں پڑے رہنے والے بڑے جانور جیسے مگرمچھ ' گرمی کی شدت سے نڈھال ہوچکے تھے اور یوں لگتا تھا کہ جیسے اس کے لبوں پر اس کی جان آگئی ہو۔
٭محرم کی دسویں تاریخ کو اتنی گرمی تھی کہ قیامت کا دن محسوس ہوتا تھا۔ پانی کی تو یہ حالت تھی جیسے وہ آگ کے الاؤ سے کھول رہا ہو۔سیخ جس پر گوشت کو بھنا جاتا ہے پانی اس کی مانند ہوچکا تھا۔ جو مچھلی پانی کی تہ پر آتی تو فورا کباب بن جاتی۔

Back to Main Page